ਮੁਹੱਬਤ ਰੇਤ ਵਿੱਚ
ਲਿਖੇ ਅੱਖਰ ਨਹੀਂ ਹੁੰਦੇ
ਜਾਂ ਪਾਣੀ ਵਿੱਚ
ਵਾਹੀ ਕੋਈ ਲਕੀਰ,
ਇਹ ਅਰੁਕ ਬਰਫ ਵਿੱਚੋਂ ਵਹਿੰਦੀ ਧਾਰਾ ਏ ਕੋਈ !
ਇਹ ਚਮਕਦਾ ਚੰਦ ਏ,
ਫਿਜ਼ਾ ਵਿੱਚ ਫੈਲਿਆ
ਸੂਰਜ ਕੋਈ,
ਜਾਂ ਚਮਕਦਾ ਛਿਪਦਾ
ਤੇ ਚਮਕਦਾ ਤਾਰਾ ਏ ਕੋਈ !
ਸਕੂਨ ਨਾਲ ਭਰਿਆ,
ਤੇ ਕਦੇ ਆਨੰਦ ਨਾਲ
ਭਰਿਆ ਵਕਤ ਹੈ ਇਹ,
ਤੇ ਕਦੇ ਦਿਲ ਉੱਤੇ
ਚਲਦਾ ਆਰਾ ਏ ਕੋਈ !
ਇਹਦੇ ਨਿੱਘ ਵਿੱਚ
ਉਗਦੇ ਜੀਵਨ,
ਇਹਦੇ ਅਭਾਵ ਵਿੱਚ
ਤੜਫਦੇ ਜੀਵਨ,
ਪਰ ਹੁੰਦਾ
ਭਰਕੇ ਜੀਵਨ ਜਿਉਣ ਵੱਲ ਹੋਇਆ ਇਸ਼ਾਰਾ ਏ
ਕੋਈ !
ਇਹ ਕੋਈ ਧਾਰਮਿਕ ਜਾਂ ਸਮਾਜਿਕ ਬੰਧਨ ਨਹੀਂ,
ਨਾ ਝੁਕਣਾ ਵਾਲਾ
ਜ਼ੋਰ ਹੈ ਇਹ ਜਾਂ,
ਦਿਲਾਂ ਵਿੱਚ
ਉੱਗਿਆ ਚੰਨ ਮੁਨਾਰਾ ਏ ਕੋਈ !
ਦੋਸ਼ ਜੋ ਦੇਂਦੇ ਮੁਹੱਬਤ
ਦੀ ਤਸੀਰ ਨੂੰ,
ਸਮਝਾਓ ਉਨਾਂ ਨੂੰ ਨਕਸ਼ਦੀਪ ,
ਮੁਹੱਬਤ ਕਬਜ਼ਾ ਨਹੀਂ,
ਰੱਬ ਵੱਲ
ਖੁਲ੍ਹਿਆ ਦੁਆਰਾ ਹੈ ਕੋਈ !
0 Comments